Trajneri i Ballkanit, Adil Vokrri, ka thënë se është i kënaqur me rrjedhën e përgatitjeve që po zhvillon skuadra e tij.

Lideri i tabelës në Ligën e Parë të Kosovës në Futboll, Ballkani, objektiv primar ka inkuadrimin në elitën e futbollit të Kosovës. Sipas Vokrrit, skuadra e tij ka fond të mjaftueshëm të lojtarëve dhe se, beson se Ballkani do të inkuadrohet në Superligën e Kosovës në Futboll.

“Ka kohë që kemi nisur përgatitjet për stinorin pranveror. Jam i kënaqur me rrjedhën e përgatitjeve. Gjithçka po ecën ashtu siç edhe kemi paraparë”, ka thënë Vokrri.

“Objektivi ynë është inkuadrimi në elitën e futbollit tonë. Skuadra është përforcuar me katër lojtarë. Jam i bindur se Ballkani ka ekip që mund t’i arrijë qëllimet e klubit. Jemi në pozitën e parë të renditjes tabelore. Pra, kemi mundësi ta prekim elitën e futbollit”, ka thënë trajneri i Ballkanit, Adil Vokrri.

Ballkani në Ulqin

Skuadra nga Theranda një pjesë të përgatitjeve do ta zhvillojë në Ulqin. Sipas Vokrrit, therandasit në Ulqin do të zhvillojnë edhe takime kontrolluese.

“Pas dy ditë do të udhëtojmë për në Ulqin, për të zhvilluar një pjesë të përgatitjeve. Atje parashikojmë të zhvillojmë edhe ndonjë takim kontrollues. Besoj se skuadra ime do të jetë e gatshme për sfidat pranverore”, ka thënë timonieri i Ballkanit, Adil Vokrri.

Fatmir Bytyçi