Mesfushori Bohumit, Faton Toski pas miqësores që Përfaqësuesja e Kosovës e zhvilloi me Renovën në Prishtinë, deklaroi se nëse drejtuesit e klubit gjerman do të ishin të informuar për gjendjen e tillë të fushës nuk do ta linin të lirë për t’iu përgjigjur ftesës së përzgjedhësit, Albert Bunjaki. “Fusha ishte shumë e keqe dhe sinqerisht klubi im nuk do të më lëshonte të vija sikur ta dinte gjendjen e kësaj fushe. Kam menduar se fusha do të jetë shumë më e mirë, por në këtë fushë nuk mund të tregosh asgjë. Nuk mund të ketë lojë të mirë në këso lloj fushash. Kosova ka lojtarë të mirë, ama në një fushë të këtillë askush nuk mund t’i tregojë vlerat e veta”, deklaroi Toski. “Edhe organizimi i ndeshjeve duhet të jetë më i mirë. Unë sërish do të vij të luaj për Kosovën, por duhet të përmirësohen disa kushte. Shpresoj se së shpejti do të luajmë edhe me përfaqësueset e vendeve tjera. Për mua gjithmonë do të jetë kënaqësi të luaj për Përfaqësuesen, por besoj se në të ardhmen edhe kushtet për lojë do të jenë më të mira”, vijoi Toski.