Mesfushori i Hysit, Yll Hoxha, është optimist që skuadra e tij do të arrijë të dalë me rezultat pozitiv nga Stadiumi Olimpik “Adem Jashari” në sfidën kundër skuadrës kampione në fuqi në Raiffeisen Superligë, Trepçës. “Pres një ndeshje të fortë, por edhe korrekte. Shpresojmë se stinorin pranveror do ta nisim mbarë. Edhe pse Trepça në këtë edicion ka ngecur paksa prapa me kreun e renditjes, megjithatë ajo ka një skuadër të fortë dhe pa dyshim na pret një detyrë e vështirë. Mirëpo, ne synojmë titullin e kampionit në këtë edicion, prandaj që nga ndeshja e parë pranverore duhet të dëshmojmë seriozitet. Besojmë se nga Mitrovica do të kthehemi me rezultat pozitiv. Gjithsesi ne do të japim maksimumin për t’i fituar tri pikë”, deklaroi Yll Hoxha. Ndeshja ndërmjet Trepçës dhe Hysit zhvillohet të dielën dhe fillon në orën 14:00, ashtu sikurse edhe ndeshjet e tjera të javës së 18-të në Raiffeisen Superligë.